డాక్టరుగారు పళ్ళు తెల్లగా అవ్వాలంటే ఏమి చేయాలి? ఇది చాలా మంది అడిగే సాధారణ ప్రశ్న. ఐతే దీనికి సమాధానం మనిషి మనిషికి మారుతుంది. కొందరికి క్లీనింగ్ చేస్తే సరిపోతుంది. మారికొందరికి బ్లీచింగ్ చేయవలసి వస్తుంది.
డెంటల్ క్లీనింగ్ మరియు బ్లీచింగ్ మధ్య చాలా తేడా ఉంది. వాటి గురించి మరింత లోతుగా తెలుసుకుందాం.
డెంటల్ క్లీనింగ్ అంటే ఏంటి?
మనం తిన్న పదార్ధాలు రాత్రి వేళల్లో పంటి క్రింద చేరి, అక్కడ గట్టి పడి, గార క్రింద మారతాయి. మన పంటి చుట్టూ చాలా గార ఉంటుంది. ఇది పసుపు పచ్చ రంగులో ఉంటుంది. గార ఎక్కువగా ముందు పళ్ళ లోపలి భాగంలో పడుతుంది మరియు, పైన పళ్ళ వెనుక భాగం అనగా దంతాల మధ్యలో పడుతుంది.
ఐతే కొంత మందికి, పళ్ళ మీద, గార కన్నా సిగరెట్, కాఫీ, మరియు టీ మచ్చలు ఎక్కువగా ఉంటాయి. వీటిని dental stains (డెంటల్ స్టెయిన్స్) అని పిలుస్తారు. ఇవి సిగరెట్ లేదా కాఫీ లేదా టీ ఎక్కువగా తాగేవారిలో ఉంటాయి.
గార లేదా డెంటల్ స్టెయిన్స్ పోవటానికి డెంటల్ క్లీనింగ్ చేయించుకోవాలి. అనగా ఎవరికై తే గార లేదా స్టెయిన్స్ ఎక్కువగా ఉంటాయో వారికి డెంటల్ క్లీనింగ్ తప్పనిసరి.
మెరుగైన నోటి ఆరోగ్యానికి మొదటి అడుగు వేయండి!
నోటి ఆరోగ్యంపై చిట్కాలను పొందండి మరియు మీ దంత ఆరోగ్యాన్ని మెరుగుపరచడానికి మార్గాలను కనుగొనండి. ఈరోజే సైన్ అప్ చేయండి
డెంటల్ క్లీనింగ్ ఎలా చేస్తారు?
మీ దంత వైద్యుని దగ్గర పళ్ళు శుభ్రం చేయటానికి ప్రత్యేకమైన పరికరాలు ఉంటాయి. వాటిని scaler (స్కేలార్) అని పిలుస్తారు. ఈ పరికరాలు మన పళ్ళ మీద ఉన్న గార మరియు మరకలుని, చాలా సునాయాసంగా తొలగిస్తాయి.
మనం వాడే టూత్ బ్రష్ అన్నీ చోట్ల సమగ్రంగా శుభ్రం చేయక పోవచ్చు. అటువంటప్పుడు డెంటల్ క్లీనింగ్ చేయించుకోవటం ఉత్తమం.
డెంటల్ క్లీనింగ్ ఎన్నిసార్లు చేయించుకోవచ్చు?
ఒక సంవత్సర కాలంలో డెంటల్ క్లీనింగ్ ఒకటి నుండి రెండు సార్లు చేయించుకోవచ్చు. ఐతే కొంత మందిలో గార చాలా త్వరగా పడుతుంది. అటువంటప్పుడు సంవత్సరానికి 3 నుండి 4 సార్లు చేయించుకోవచ్చు.
డెంటల్ క్లీనింగ్ చేయించుకొనేటప్పుడు తీసుకోవాల్సిన జాగ్రత్తలు ఏంటి ?
- కొందరిలో క్లీనింగ్ తరువాత పళ్ళు సల్పడం చూస్తూ ఉంటాము. ఐతే ఇది కొన్ని రోజులు ఉండే అవకాశం ఉంటుంది. ఇటువంటి పరిస్థితి బాగా అరిగిన పళ్ళలో ఎక్కువగా కనిపిస్తుంది. కావున ఎక్కువగా పళ్ళు అరిగినవారు ఇది గమనించగలరు. పళ్ళు ఒకటి లేదా రెండు రోజులలో మామూలు స్థాయికి వచ్చేస్తాయి.
- క్లీనింగ్ చేయించుకున్న తరువాత పళ్ళు చాలా కరుగ్గా తయారవుతాయి. దీనికి కారణం, క్లీనింగ్ తరువాత పంటి మీద ఉండే స్లయిమ్ లేయర్ (Slime layer) అనే పొర పోతుంది. దీని వలన పళ్ళు కరుగ్గా అనిపిస్తాయి. కానీ ఒక్క రోజులో మన లాలా జలం, పళ్ళ పైన స్లయిమ్ లేయర్ తయ్యారు చేస్తుంది. అందువలన దీని గురించి ఎక్కువగా చింతించవలసిన అవసరం లేదు.
- అంతే కాదు, పాత స్లయిమ్ లేయర్ తీసివేయటం వలన పళ్ళ పైన పిప్పి (decay) వచ్చే ఆస్కారం కూడా తగ్గుతుంది.
- చిగుళ్ల వ్యాధి ఉన్నవారిలో డెంటల్ క్లీనింగ్ చేసిన తరువాత పళ్ళు కదలటం ఎక్కువ అయినట్లు అనిపిస్తుంది. ఐతే ఇది అపోహ మాత్రమే. స్వతహాగా చిగుళ్ల వ్యాధి ఎక్కువగా ఉన్నవారిలో గార చాలా ఎక్కువగా ఉంటుంది. ఈ గార పంటి క్రింద ఉన్న చిగురుని మరియు ఎముకను ఇంకా క్రిందకు జరుపుతుంది. దానివలన, స్వతహాగా పళ్ళు బలహీన పడతాయి. ఐతే గార ఉండటం వలన మీకు ఆ కదలిక తెలీదు. ఎప్పుడైతే గార తీసివేస్తామో అప్పుడు పళ్ళ యొక్క అసలు కదలిక తెలుస్తుంది. చాలా మంది ఇది క్లీనింగ్ చేయించుకున్న తరువాత వచ్చిందని అపోహ పడుతుంటారు.
- చిగుళ్ల వ్యాధి ఉన్న వారిలో తప్పని సరిగా క్లీనింగ్ చేయించుకోవాల్సిన అవసరం ఉంది. లేదంటే చిగురు మరియు ఎముక ఇంకా క్రిందకు జారీ, పన్ను త్వరగా ఊడే ఆస్కారం ఉంటుంది. అదే డెంటల్ క్లీనింగ్ చేయించుకున్నట్లైతే, మొదట్లో పళ్ళు కదిలినట్లు అనిపించినా, క్రమంగా అవి గట్టిపడి పళ్ళు ఎక్కువ కాలం మన్నే ఆస్కారం ఉంటుంది.
డెంటల్ బ్లీచింగ్ (Bleaching) అంటే ఏంటి?
కొంత మందిలో స్వతహాగా పళ్ళు చాలా శుభ్రంగా ఉంటాయి. ఐతే వారి పంటి రంగు మాత్రం కొంచం పసుపు పచ్చ రంగులో ఉంటుంది. అటువంటి వారు, డెంటల్ బ్లీచింగ్ చేయించుకోవచ్చు. బ్లీచింగ్ అనే ప్రక్రియలో, కొన్ని రసాయనాలను పంటి పైన అద్ది, వాటి సహాయంతో పసుపు రంగు పళ్ళను తెల్ల పళ్లగా మారుస్తారు.
డెంటల్ బ్లీచింగ్ ఎలా చేస్తారు?
బ్లీచింగ్ లో మొదటగా, పళ్ళ పైన కార్బమైడ్ పెరాక్సైడ్ (carbamide peroxide) లేదా హైడ్రోజన్ పెరాక్సైడ్ (Hydrogen peroxide) వంటి రసాయనాలను ఉంచుతారు. అటువంటి పళ్ళను అతినీలలోహిత కాంతి లో (ultra violet light) ఉంచుతారు.
రసాయనాలు పంటి యొక్క పసుపు రంగుని తెల్లగా మారుస్తాయి. ఐతే వచ్చిన తెలుపు రంగుతో మీరు సంతృప్తి చెందని యెడల ఈ ప్రక్రియ మరలా జరుపుతారు.
డెంటల్ బ్లీచింగ్ ఎన్నిసార్లు చేయించుకోవచ్చు?
బ్లీచింగ్ ప్రక్రియ వలన పళ్ళు దెబ్బతినే అవకాశం ఉంటుంది. కావున తప్పనిసరి సమయాలలో మాత్రమే చేయించుకోవటం ఉత్తమం. అనగా
- పెళ్లి సమయంలో
- ఏదైనా ఫంక్షన్ ఉన్నప్పుడు
- పళ్ళు బాగా పచ్చగా కనిపిస్తే
బ్లీచింగ్ అనేది ప్రతిసారీ చేయించుకునే ప్రక్రియ కాదు. అవసరం అయితేనే చేయించుకోవాలి.
డెంటల్ బ్లీచింగ్ చేయించుకొనేటప్పుడు తీసుకోవాల్సిన జాగ్రత్తలు ఏంటి?
- బ్లీచింగ్ ప్రక్రియ ఎక్కువ సార్లు చేయించుకొనేటప్పుడు, రసాయనాల వల్ల పంటి పైన పొర దెబ్బ టీనా వచ్చు. అటువంటప్పుడు అక్కడితో ప్రక్రియను ముగించటం ఉత్తమం.
- బ్లీచింగ్ చేయించుకున్న తరువాత కొందరిలో పంటి సలుపులు ఎక్కువగా వస్తాయి. అటువంటప్పుడు, మీ దంత వైద్యుడు సూచించిన టూత్ పేస్ట్ తప్పనిసరిగా వాడవలెను.
- బ్లీచింగ్ చేయించుకునే క్రమంలో చిగుళ్లు కాస్త వాపులకు లోనవుతాయి. ఐతే ఇది రెండు రోజులలో సాధారణ స్థాయిలోకి వచ్చేస్తాయి.
- బ్లీచింగ్ చేయించుకున్న తరువాత ఒక రెండు రోజులు బాగా చల్లటివి గాని లేదా వేడివిగాని తీసుకోకపోవటం ఉత్తమం.
- కొంత మందిలో పన్ను పెరుగుదలలో సమస్య ఉంటుంది. ఉదాహరణకి మేనరికపు పెళ్ళిళ్లలోని కొంతమంది పిల్లలకు పుట్టుకతోనే పళ్ళు పచ్చగా ఉంటాయి. వీరిలో పంటీ మొదటి పొర సరిగ్గా ఏర్పడదు. అటువంటి వారు బ్లీచింగ్ చేయించుకోవటం మంచిది కాదు.
డెంటల్ క్లీనింగ్ మరియు బ్లీచింగ్ మధ్య తేడా ఏంటి?
ఇప్పటికీ మేకు క్లీనింగ్ మరియు బ్లీచింగ్ మధ్య గల తేడా అర్థమయ్యే ఉంటుంది అనుకుంటున్నాను. ఐతే ఒకసారి క్లుప్తంగా చూద్దాము.
డెంటల్ క్లీనింగ్ | డెంటల్ బ్లీచింగ్ |
పళ్ళ పైన గార మరియు మరకలు శుభ్రం చేయటానికి. | పళ్ళ యొక్క రంగు మెరుగు పరచటానికి. |
సంవత్సరం లో రెండు నుండి 3 సార్లు చేయించుకోవచ్చు. | అవసరమయితే నే చేయించుకోవాలి. |
ఎటువంటి రసాయనాలను వాడరు. | రసాయనాలను వాడి పంటి రంగు మెరుగు పరుస్తారు. |
ఎవరైనా చేయించుకోవచ్చు. | పన్ను పెరుగుదలలో సమస్య ఉన్నవారు చేయించుకోకూడదు (మేనరికపు పెళ్ళిళ్లలో కనిపిస్తుంది) . |